230 працаўнікоў «Гомельаблбуду» неўзабаве застануцца без працы

«Гомельаблбуд была самая сур’ёзная фірма ў Гомлі, але каб так разваліць«, – распавёў »Белсату« механік прадпрыемства Юрый Чарнабаеў.

Яшчэ летась прадпрыемства ўваходзіла ў дзясятку арганізацыяў, што рэгулярна атрымоўвалі дзяржзамовы. А сёлета «Гомельаблбуду» прызначылі крызіснае кіраўніцтва, хаця з праблемаў ужо хутчэй і так не выбрацца: у 2015 банкрутам прызналі 49 філіял гэтай арганізацыі, на гэтым тыдні вядома ўжо пра другі СПМК, што ліквідуюць.

«Мы працавалі. Гэта ўсё пайшло ад кіраўнікоў. Улезлі ў даўгі, а даўгі выплачваць няма чым. Можа калі б рахункі былі ў нас, то выжылі б, А так яны ў трэсце, а яго не накорміш ніколі», – кажа супрацоўнік ПМК Аляксандр Барсукоў.

Паводле нашых суразмоўцаў, стагнацыя на СПМК назіралася апошнія паўгода, што да заробкаў – плацілі нават менш, чымся па два мільёны. І ў іх выпадку, ліквідацыя прадпрыемства азначае, што за свае «кроўныя» давядзецца яшчэ пазмагацца. Прыклады нявыплаты заробкаў адбываліся ў сястрынскім філіяле нумар 93.

«Тры месяцы не плацілі заробак, толькі праз суд выплацілі», – распавядае былы супрацоўнік Веткаўскага ПМК 93.

Безумоўна, да судовых разбіральніцтваў можа і не дайсці. Юрыдычна, з моманту ўнясення запісу аб ліквідацыі прадпрыемства ў Адзіны дзяржаўны рэгістр юрыдычных асоб даўжнік лічыцца свабодным ад пазыкаў. Калі ўсё зрабіць пісьменна, пасля банкруцтва застануцца сродкі: ад продажу тэхнікі, маёмасці. Аднак ці пойдуць гэтыя сродкі на карысць выплатаў былым працаўнікам – невядома. Спосабаў жа падстрахавацца ці абараніць свае эканамічныя правы ў сённяшніх рэаліях не шмат.

«Што рабіць працаўніку? Гэта артыкул нумар 41 канстытуцыі : аб’ядноўвацца ў прафсаюзы, калектыўныя дамовы і самае што яшчэ важнае – права на страйк», – кажа былы працаўнік «Гоммельаблстрою».

На жаль, гэтыя захады працаўнікам будаўнічага гіганта ўжо не дапамогуць. Ад 3 кастрычніка ўсе 230 чалавек застануцца афіцыйна беспрацоўнымі.