Сасноў адкідае абвінавачванні БТ на адрас НІСЭПД

У рэпартажы сьцьвярджаецца, што сацыялягічныя дасьледаваньні, вынікі якіх пэрыядычна публікуе НІСЭПД (Незалежны інстытут сацыяльна-эканамічных і палітычных дасьледаваньняў), — гэта фэйк, а грошы, якія выдзяляюцца інстытуту замежнымі партнэрамі, забіраюць сабе яго кіраўнікі.

Журналісты «Беларусь 1» заявілі, што яны прыйшлі да такой высновы на падставе дакумэнта з унутранай справаздачай НІСЭПД, які трапіў да іх выпадкова, а таксама на падставе інтэрвію зь людзьмі, якія, паводле дакумэнтаў інстытуту, бралі ўдзел у сацапытаньнях. На камэру гэтыя людзі адмаўляюць сваю датычнасьць да дасьледаваньня.

Экс-міністр працы, супрацоўнік НІСЭПД Аляксандр Сасноў сказаў Радыё Свабода, што матэрыял БТ не адпавядае рэчаіснасці:

«На БТ сказалі, што ў НІСЭПД не праводзіцца ніякіх даследаванняў. А хто-небудзь бачыў надрукаваныя вынікі сацыялагічных даследаванняў ад дзяржаўных сацыялагічных службаў? Я — не. Дык вынікае, што дзяржава таксама прадукуе фэйкі».

Аляксандр Сасноў лічыць, што фільм «Прымат НІСЭПД», падрыхтаваны каналам «Беларусь 1», можа быць звязаны з выбарчай кампаніяй, якая выклікае ў грамадстве цікавасць да палітычных падзеяў:

«Можа, гэта звязана з выбарчай кампаніяй. А можа, знайшоўся чалавек, які захацеў нешта прыціснуць. Гэта ж як бывае. Калі ўзяць чалавека і прыціснуць яму пальцы дзвярыма, дык ён што заўгодна на камеру скажа. Таму верыць БТ немагчыма».