Удзельнікаў акцыі 27 ліпеня на плошчы Незалежнасці выклікаюць у міліцыю

"Патэлефанавалі з міліцыі, каб ад заўтра прыходзіў азнаёміцца з пратаколам. Адмовіўся, бо лічу, што нічога не парушаў. Мы выйшлі са сцягамі на плошчу, але ніякіх плакатаў і лозунгаў не было. Проста нагадалі грамадству, што быў такі дзень, калі пранялі дэкларацыю аб незалежнасці і гэты дзень адзначаўся, як дзяржаўнае свята. Што тут незаконнага? Дарэчы, мяне пра незаконнасць акцыі на плошчы ніхто не папярэджваў", — патлумачыў "Радыё Свабода" Леанід Кулакоў.

Паводле актывіста, Максім Вінярскі таксама адмовіўся ісці ў міліцыю для азнаямлення са складзеным на яго пратаколам.

27 ліпеня а 8.30 у Мінску на плошчы Незалежнасці і ў пачатку праспекту Незалежнасці пачалася акцыя, прысвечаная прыняццю ў гэты дзень у 1990 годзе Дэкларацыі аб суверэнітэце Беларусі. Больш за 20 актывістаў расцягнуліся ў ланцуг з бел-чырвона-белымі сцягамі ў руках. Акцыя доўжылася амаль 1,5 гадзіны. Мінакам таксама былі раздадзеныя бел-чырвона-белыя стужкі.

Затрыманняў удзельнікаў падчас акцыі не было, але міліцыянты адразу ж пачалі складаць пратаколы на актывістаў, чые прозвішчы ведалі.