Расія можа прызнаць БНФ і "Малады фронт" экстрэмісцкімі арганізацыямі

З ініцыятывай выступіў дэпутат Дзяржаўнай Думы Расіі Вадзім Салаўёў ад КПРФ. Ён звярнуўся да генеральнага пракурора Расіі Юрый Чайкі з прапановай вывучыць дзейнасць Партыі БНФ, а таксама "Маладога фронта".

Па словах Салаўёва, "гэтыя арганізацыі вылучаюцца асаблівай русафобіяй і ўсхваляюць злачынцаў часоў Другой сусветнай вайны". "Падобных фактаў можа хапіць, каб прызнаць гэтыя арганізацыі экстрэмісцкімі на тэрыторыі Расіі", — адзначыў ён.

"Многія беларускія нацыяналісты ўжо былі заўважаныя ў шэрагах сумніўных фарміраванняў, якія вядуць баявыя дзеянні на Данбасе. Ваююць, вядома, за Кіеў", — дадаў дэпутат, зазначыўшы, што да нядаўняга часу беларускія нацыяналісты былі "траваеднымі", аднак падзеі ва Украіне іх натхнілі.

У якасці абуральных прыкладаў Салаўёў прыводзіць тое, што сябры "Маладога фронту" выходзілі на Дзень Волі з партрэтамі Міхася Вітушкі і ксяндза Вінцэнта Гадлеўскага.

"Што тычыцца БНФ, то гэта выглядае вельмі дзіўна, бо ў нас нейкая ядроная саюзная дзяржава з Расіяй. А БНФ афіцыйна зарэгістраваная структура, будзе дзіўна, калі іх прызнаюць экстрэмістамі. "Маладому фронту" ў гэтым плане прасцей, мы не зарэгістраваныя ў Беларусі і нам начхаць, што яны прымуць у Расіі, - адзначыў адзін з лідараў арганізацыі Зміцер Дашкевіч. -Мы ўдзячныя дэпутату за інфармацыйную і піяр падтрымку. Пасля таго, як у Расіі ўзялі ў палон Джона Сільвера, стала зразумела, што людзям, якія выступаюць за цэласнасць украінскай дзяржавы, супраць рускага шавінізму, проста нельга ездзіць у Расію", паведамляе "Наша ніва".