З Гродна ў Кракаў пусцяць адмысловы цягнік

Гэта стала рэальным дзякуючы намаганням каталіцкага касцёла, а таксама польскай і беларускай чыгункі, памежных і мытных службаў дзвюх краінаў, паведамляе «Радыё Рацыя».

Як зазначыў галоўны каардынатар Сусветных дзён моладзі ў Беларусі ксёндз Антоні Грэмза, сустрэча Папы Рымскага з моладдзю ў Кракаве дала падставы для станоўчага вырашэння транспартнага пытання паміж краінамі.

– Гэта таксама і воля Божая, і прадбачлівасць. Гэта і пазітыўнае стаўленне нашых беларускіх уладаў да гэтай падзеі, да прыезду Папы Францішка, каб моладзь мела такую цудоўную магчымасць сустрэцца між сабою і з Папам Францішкам.

Больш за чатырыста пілігрымаў з усёй Беларусі мае намер ехаць на Сусветныя дні моладзі на спецыяльным цягніку, які 20 ліпеня ад’едзе з гарадзенскага чыгуначнага вакзала. Першага жніўня, пасля заканчэння Сусветных дзён моладзі, цягнік прывязе пілігрымаў назад у Гродна.