Беларусь пагражае «рашучымі дзеяннямі» ў адказ на адхіленне ад Алімпіяды каманды весляроў

Напярэдадні беларускі бок атрымаў паведамленне аб тым, што выканаўчы камітэт Міжнароднай федэрацыі каноэ (ICF) адхіляе ад спаборніцтваў тэрмінам на адзін год мужчынскую каманду Беларусі ў веславанні на байдарках і каноэ, уключна з трэнерамі, медычным персаналам і групай абслугоўвання. Такім чынам сем спартоўцаў, якія заваявалі алімпійскія ліцэнзіі, не змогуць выступіць на Алімпійскіх гульнях у Рыа-дэ-Жанэйра, піша Радыё Свабода.

Падставай да такога рашэння стаў візіт паліцыі сёлета ў красавіку ў лагер беларускай каманды ў французскім горадзе Ля Тампль-сюр-Лё, дзе адбываўся трэніровачны збор перад Алімпіядай. Ператрус быў ініцыяваны антыдопінгавым агенцтвам Парыжу і дазволены пракурорам гораду Ажэн — аператыўнікі шукалі забаронены прэпарат мяльдоній.

Нягледзячы на тое, што ніякага кампрамату знайсці не ўдалося, праз тры месяцы пасля паліцэйскай інспекцыі было прынятае рашэнне адхіліць на час дадатковага следства мужчынскую каманду ад стартаў.

З гэтай прычыны Нацыянальны алімпійскі камітэт ды Міністэрства спорту і турызму выступілі з афіцыйнай заявай, у якой, у прыватнасці, гаворыцца:

«Рашэнне выканкаму ICF абсалютна нічым не абгрунтаванае і вынесена на падставе надуманых прычынаў. Ніводнаму з чальцоў нацыянальнай каманды да гэтага часу не прад’яўлена ніякіх абвінавачанняў, пасяджэнняў суда не праходзіла, віна спартоўцаў і трэнераў не вызначаная, прынцып прэзумпцыі невінаватасці груба парушаны».

У сумеснай заяве ведамстваў звяртаецца ўвага, што сябры выканкаму ICF свядома зацягвалі вынясенне вердыкту, ведаючы, што тэрмін афіцыйнай заяўкі для ўдзелу ў Алімпіядзе-2016 заканчваецца 18 ліпеня, адпаведна, часу на абскарджанне і абарону законных інтарэсаў спартоўцаў практычна не застаецца. Тым не меней, сфармаваны неабходны пакет доказаў, у тым ліку і персанальна ад асобы кожнага са спартоўцаў. Гэтаксама беларускі бок падрыхтаваў афіцыйны зварот у спартыўны арбітражны суд у Лазане, які павінен быў паступіць туды сёння раніцай.

«Метады, якія выкарыстоўваюцца напярэдадні Алімпіяды на адхіленне вядучых спартоўцаў ад барацьбы за ўзнагароды, выклікаюць здзіўленне, — гаворыцца ў адкрытым лісце галоўных спартовых структураў Беларусі. — За імі праглядаецца невыкананне прынцыпаў сумленнай барацьбы, лабіраванне асабістых інтарэсаў і карупцыйны складнік у падыходзе да асобных камандаў. У гэтай сувязі Нацыянальны алімпійскі камітэт Беларусі праводзіць перамовы і кансультацыі з кіраўніцтвам і сябрамі Міжнароднага алімпійскага камітэту».

Беларускі бок заяўляе, што пакідае за сабой права на «самыя рашучыя дзеянні» ў сувязі з запланаваным на канец ліпеня ў Мінску чэмпіянатам свету ў веславанні на байдарках і каноэ сярод юніёраў і моладзі.

Тым часам на прапанову беларускіх алімпійскіх чэмпіёнаў і прызёраў розных гадоў распачаты збор подпісаў на адрас прэзідэнта Міжнароднага алімпійскага камітэту Томаса Баха ў падтрымку мужчынскай зборнай Беларусі ў веславанні на байдарках і каноэ.

Пікантнасць сітуацыі палягае ў тым, што літаральна за некалькі дзён да агучанага рашэння ICF падчас урачыстых провадаў з удзелам спартовай дэлегацыі на летнія Гульні-2016 капітанам беларускай каманды быў абраны вясляр Аляксандар Багдановіч — чэмпіён Алімпіяды-2008 у Пекіне і срэбны прызёр Алімпіяды-2012 у Лондане.

З прычыны становішча, у якое трапілі беларускія весляры і на якіх ускладаліся асноўныя медалёвыя спадзяванні беларусаў, сёння ў Мінску запланаваная прэс-канферэнцыя з удзелам кіраўнікоў НАК і Мінспорту.