За лоўлю пакемонаў у Беларусі могуць затрымаць

Хоць яна яшчэ афіцыйна не выйшла ў Беларусі, яе можна неафіцыйна ўсталяваць на Android, а на iOS - спампаваць з App Store, калі завесці амерыканскі Apple ID.

І покемоны ў Беларусі ловяцца дзе заўгодна: у храмах, на могілках, будоўлях, ля будынкаў КДБ і адміністрацыі Лукашэнкі ... Пры гэтым гульня прапануе карыстацца камерай смартфона: вобразы віртуальных пакемонаў ў працэсе гульні накладаюцца на рэальную карцінку, якую здымае камера, піша "Радыё Свабода".

Некаторыя месцы ў Беларусі забаронена фатаграфаваць. Дакладней, міліцыя не раз спасылалася на спіс забароненых для здымак аб'ектаў, але гэты спіс нікому ніколі не паказвалі.

Ці будуць затрымліваць і штрафаваць лаўцоў пакемонаў каля «прэзідэнцыі» (так сама гульня называе рэзідэнцыю Лукашэнкі на Карла Маркса, 38) і КДБ? Прэс-сакратар мінскай міліцыі Аляксандр Ластоўскі кажа:

«Пытанне такое ... дастаткова складанае. Мне цяжка сказаць, як будзе трактавацца дадзенае дзеянне. Я б не стаў, дапусцім, у мэтах асабістай бяспекі ў тым ліку. Не стаў бы на тэлефон здымаць гэтыя будынкі. Але мне цяжка сказаць».

Атрымаць спіс забароненых аб'ектаў і даведацца, якая вызначаная адказнасць за іх фатаграфаванне, журналістам не ўдалося. А прававы акт, які тычыцца правоў грамадзян, мусіць быць афіцыйна апублікаваны і ўнесены ў рэестр.

Зрэшты, чыста тэхнічна гульня ў Pokemon GO - не фатаграфаванне, выявы не захоўваюцца ў памяці аўтаматычна. Тым не менш, калі ўявіць, што выкарыстанне камеры падчас гульні ў «пакемоны» прыраўняюць да фатаграфавання, то можна атрымаць наступны спіс.

Дзе нельга лавіць пакемонвў (забарона зафіксаваная ў законах і пастановах):

- У месцах, куды доступ звычайным грамадзянам абмежаваны або забаронены з прычын аховы дзяржаўнай таямніцы.

- На ваенных i рэжымных аб'ектах.

- На борце самалёта і на фоне самалётаў у аэрапорце.

- Падчас праходжання памежнага кантролю.

- У судах падчас працэсу без дазволу суда.

- У папраўчых установах без дазволу адміністрацыі.

- У бібліятэках і музеях без дазволу адміністрацыі.

- У казіно і залах гульнявых аўтаматаў без дазволаў ад арганізатараў і ўдзельнікаў гульняў.

- У метро, ​​на магістральных трубаправодах і іншых рэжымных аб'ектах.

- У амбасадах.

Дзе лепш не лавіць пакемонаў (забароны не зафіксаваныя, але гучаць у вуснай форме):

- Унутры і каля адміністрацыйных будынкаў, міністэрстваў, рэзідэнцый Лукашэнкі, Акадэміі навук, Дома ўрада, КДБ.

- На фоне міліцыянтаў і супрацоўнікаў спецслужбаў пры выкананні службовых абавязкаў.

- На вакзалах і аэрапортах ў месцах, адкрытых для свабоднага наведвання.

- У кінатэатрах падчас дэманстрацыі фільму.

- У цэрквах, касцёлах і іншых рэлігійных аб'ектах.

Што за гэта будзе?

Гэта невядома. Звычайна, калі міліцыя спасылаецца на забарону фатаграфавання, то просіць выдаліць здымкі. Але бывалі выпадкі, калі беларусаў затрымлівалі за фота, трымалі ў пастарунку і праз некаторы час адпускалі.

Могуць быць і штрафы за фатаграфаванне забароненых аб'ектаў, але яны пакуль не прымяняліся. Затое існуе адказнасць за непадпарадкаванне законным патрабаванням міліцыі.

Не раз бывалі выпадкі, калі грамадзяне сцвярджалі, што ім прыпісвалі нецэнзурную лаянку і дробнае хуліганства, калі нібыта не маглі аштрафаваць за нешта іншае.

Дзе можна лавіць пакемонаў (забароны абвяшчаюцца, але яны не законныя):

- У крамах і гандлёвых цэнтрах.

- У барах, клубах, рэстаранах.

- У банках.

- У ЗАГСах.

- Ва ўстановах аховы здароўя.

- На стадыёнах.

- На фоне іншых людзей у грамадскіх месцах (калі толькі пад выглядам гульні ў покемоны вы не захоўвайце фота, што раскрываюць асабістую і сямейную тайну).

Але нават у дазволеных месцах варта не забываць пра асабістую бяспеку: віртуальныя пакемоны могуць завесці гульца на рэальныя аўтамабільныя дарогі, чыгуначныя каляіны, будоўлі, у адкрытыя люкі, у вадаёмы або ў крымінальныя раёны.

Як адключыць камеру ў Pokemon GO

Падчас лоўлі пакемонаў або баёў за арэну ў правым верхнім куце экрана з'яўляецца перамыкач «AR». У гульні гэта не тлумачыцца, але перамыкач выключае камеру і пераключае працэс гульні ў віртуальны рэжым (AR - Augmented reality, дапоўненая рэальнасць). Таму, калі вы хочаце злавіць пакемона побач з КДБ, адключайце рэжым AR - пакемон нікуды не ўцячэ, а гульня не будзе патрабаваць выкарыстання камеры.