У Слоніме з'явіцца помнік Агінскаму

На вуліцы Савецкай у Слоніме захаваўся будынак другой паловы XVIII стагоддзя, пабудаваны архітэктарам Боем, які ён праектаваў пры палацы Міхала Казіміра Агінскага (1730-1800). Пры палацы Агінскага ў гэтым будынку была аўстэрыя (заезны дом). Ён сёння нагадвае слонімцам і гасцям горада пра гетмана Вялікага Княства Літоўскага, мецэната, кампазітара, мастака і паэта.

Некалі свой Слонім Агінскі ператварыў у “сядзібу музаў”, вядомую ва ўсёй Еўропе, але сёння амаль забытую ў Беларусі.

Слонімскі скульптар Леанід Богдан стварыў бюст Міхала Казіміра Агінскага, паведамляе «Радыё Рацыя». Ён плануе ў спецыяльнай арцы прымацаваць бюст на былой аўстэрыі Агінскага, каб «слонімцам і гасцям горада над Шчарай было бачна, хто з’яўляўся некалі яго гаспадаром».