Беларускія ўлады высылаюць з краіны трох польскіх ксяндзоў

«Радасныя святкаванні cярэбранага юбілею заснавання Мінска-Магілёўскай мітраполіі, якія ўзначаліў спецыяльны пасланнік Папы Рымскага Францішка арцыбіскуп Вены кардынал Крыстаф Шонбарн, былі азмрочаны рашэннем дзяржаўных уладаў аб неўзгадненні душпастырскай дзейнасці трох святароў з Польшчы», - паведамляе афіцыйны сайт Касцёлу ў Беларусі.

Рашэнне аб непрацягу дзейнасці ў Беларусі прынятае ў адносінах да дамініканіна а. Рамана Шульца, пробашча парафіі Св. Казіміра ў Магілёве; канвентуальнага францішканіна а. Леха Баханэка — пробашча парафіі Св. Міхала Арханёла ў Івянцы; аблата а. Ежы Катоўскага — пробашча парафіі Найсвяцейшага Сэрца Езуса і св. Крыштафа ў Калодзішчах.

«11 ліпеня я разам з біскупскім вікарыем для Магілёўскай вобласці, біскупам Аляксандрам Яшэўскім сустрэўся з Упаўнаважаным па справах рэлігій і нацыянальнасцяў пры Савеце Міністраў Рэспублікі Беларусь Леанідам Паўлавічам Гулякам з мэтай высветліць прычыну адмовы для служэння вышэйзгаданым святарам і прасіць дазволу для іх працягнуць сваё служэнне, - паведамляе арцыбіскуп Тадэвуш Кандрусевіч. - Аднак з вялікім жалем павінен паведаміць, што мы не даведаліся аб канкрэтных прычынах такога рашэння і пачулі рашучую адмову магчымасці іх далейшага служэння ў Беларусі».

Паводле Кандрусевіча, «гэтыя святары доўга і вельмі плённа служылі вернікам Беларусі — будавалі і рамантавалі касцёлы, катэхізавалі, займаліся хрысціянскім выхаваннем дзяцей і моладзі, дабрачыннасцю і г.д.». Таму рашэнне улады называецца «вельмі вялікай стратай для Мінска-Магілёўскай архідыяцэзіі».