Беларусь палепшыла свой стан у Глабальным рэйтынгу міру

Штогадовы рэйтынг быў апублікаваны арганізацыяй Vision of humanity 8 чэрвеня.

У Беларусі палепшыліся вынікі ў катэгорыях “Мілітарызацыя” і “Грамадства і бяспека”. Найгоршая сітуацыя, паводле аналітыкаў, у Беларусі захоўваецца ў катэгорыях “гвалт падчас дэманстрацыяў” і гвалт “з боку паліцыі і афіцэраў бяспекі”.

Аўтары даследвання ацэньваюць 163 краіны па 23 індыкатарах, сярод якіх — палітычная стабільнасць, захаванне правоў чалавека, узровень злачыннасці, становішча зняволеных, доступ грамадзян да зброі, адносіны з суседнімі дзяржавамі і іншыя.

“Найменш мірнымі” дзяржавамі ў рэйтынгу прызналі Сірыю, Ірак,Паўднёвы Судан, Афганістан, Самалі і Емен.

“Самымі мірнымі” краінамі ў рэйтынгу прызнаныя Ісландыя, Данія, Аўстрыя, Новая Зеландыя, Партугалія, Чэхія, Швейцарыя.

Сярод нашых суседзяў найбольш высокую пазіцыю ў рэйтынгу займае Польшча — 22 месца, Латвія — 32-ое, Літва — 37-ае.

Расія паднялася на адну пазіцыю і заняла 151 месца са 163.Украіна апусцілася на 156 месца, страціўшы шэсць пазіцыяў. Яна апынулася ў пяцёрцы краінаў, якія дэманструюць найгоршую дынаміку, разам з Еменам, Лівіяй,Турцыяй і Бахрэйнам.

Казахстан займае 75 месца, Грузія — 85-ае,Малдова — 65-ае, Эстонія — 36-ае, паведамляе "Еўрарадыё".