Зміцер Дашкевіч: Будзем пікетаваць адкрыццё прарасійскага графіці

Вялізны мурал на вуліцы Магілеўскай выклікаў абурэнне ў многіх мінчукоў. У інтэрнэце днямі з’явілася мноства фотакарыкатураў і нават петыцыя з заклікам зафарбаваць выяву.

«Мы мусім адарвацца ад канап і нейк адрэагаваць на прарасійскія акцыі, – заявіў «Радыё Рацыя» палітык Зміцер Дашкевіч. – Для мяне, напрыклад, дзіка як нашыя ўлады могуць замалёўваць графіці з Быкавым, саджаць у турму за графіці “Беларусь мая – будзь беларускай”, і ў той жа момант арганізоўваць нейкія ідэалагічна вывераныя малюнкі на будынках. Таму што на сённяшні дзень выказваць ва ўсе бакі сваё сяброўства з Масквой, гэта тое ж самае, як, напрыклад, у 39-м – 43-м годзе выказваць сваё сяброўства з Берлінам».

«Чамусьці ў нас не з’явіліся графіці пра сяброўства з Кіевам ці Варшавай», – дадае Дашкевіч.

Адкрыццё выявы мае адбыцца 8-га чэрвеня а 17-й гадзіне.

Маладафронтаўцы плануюць прыйсці на імпрэзу з плакатамі “Расія – гэта вайна”, “Не вайне” ды іншымі.