«Вясна» і БХК пачалі сумесную кампанію назірання за выбарамі ў Палату прадстаўнікоў

Выбары пройдуць 11 лістапада, а ўжо хутка 50 доўгатэрміновых назіральнікаў пачнуць адсочваць дзеянні выбарчых камісій, вылучэнне кандыдатаў у 200 выбарчых акругах ды іншыя працэсы, звязаныя з выбарамі. Далей колькасць назіральнікаў плануецца павялічыць да 450, паведамляе «Радыё Свабода».

«За якімі менавіта выбарчымі акругамі мы будзем назіраць, залежыць ад розных прычынаў. Да 50 доўгатэрміновых назіральнікаў плануем далучыць яшчэ не меней за 400. Будзем звяртацца да актывістаў, заклікаць валанцёраў. З былога досведу ведаем, што гэта магчыма — выйсці на такую лічбу, каб закрыць усе акругі і забяспечыць назіральнікамі як мага больш выбарчых участкаў», — паведаміў на прэсавай канферэнцыі ў «Вясне» з нагоды старту кампаніі назірання старшыня БХК Алег Гулак.

Паводле эксперта кампаніі «Праваабаронцы за свабодныя выбары» Валянціна Стэфановіча з «Вясны», назіранне за выбарамі мусіць ацаніць выбарчы працэс у краіне з пункту гледжання беларускага выбарчага заканадаўства і міжнародных стандартаў свабодных і дэмакратычных выбараў.

«Мы будзем інфармаваць міжнародную супольнасць пра ход выбарчай кампаніі і выніках маніторынгу. Але канешне, галоўнае для нас — засведчыць для беларускай грамадскасці, як ідуць выбары», — сказаў Валянцін Стэфановіч.