Даследаванне: Беларускае грамадзянства горшае за албанскае і ганскае

Грамадзянства Беларусі ацанілі крыху вышэй за ўкраінскае (87 пазіцыя), але ніжэй за расійскае (60-я), латвійскае (24-я), літоўскае (23-я) і польскае (22-я).

Рэйтынг ацэньвае параметры, якія ўплываюць на якасць жыцця грамадзяніна: маштаб эканомікі, развіццё чалавечага патэнцыялу, грамадскі парадак, стабільнасць, бязвізавы доступ для кароткачасовых паездак, магчымасць бязвізавага пражывання і працы за мяжой (апошнія два маюць падвойную вагу ў параўнаньні з першымі трыма).

Складае яго пяты год кампанія планавання месца жыхарства Henley & Partners разам з прафесарам Дзмітрыем Кочанавым, загадчыкам кафедры канстытуцыйнага права Еўразвязу ва ўніверсітэце Гронінгена ў Нідэрландах.

Лідары рэйтынгу сёлета — Нямеччына, Данія, Фінляндыя, Нарвегія і Ісландыя. Беларусь жа суседнічае з Ганай, Албаніяй і Калумбіяй (месцы 79–81) ды Казахстанам, Гамбіяй і Бенінам (месцы 83–85).

Паводле «ўнутраных» фактараў (эканоміка, чалавечае развіццё, мір і стабільнасць) Беларусь 86-я, паводле «свабоды падарожжаў» (колькасць краінаў з бязвізавым уездам для грамадзяніна) — 102-я, а паводле «свабоды пасялення» (тут улічваюцца паказчыкі чалавечага развіцця і стану эканомікі ў краінах, якія грамадзянін можа наведаць і ў якіх пасяліцца без візы) — 28-я.

У агульным рэйтынгу Беларусь займала 78-е месца летась, 79-е — у 2013-м, 78-е — у 2012-м і 76-е — у 2011 годзе, піша Радыё Свабода.