Аб’яўлены конкурс на ідэю мемарэалізацыі Курапатаў

Зацверджаны склад аргкамітэту і журы адкрытага грамадскага конкурсу на лепшую ідэю мемарэалізацыі Курапатаў, а такасама на найлепшы мастацкі твор па курапцкай тэматыцы. Як вядома, урочышча Курапаты пад Менскам з’яўляюцца месцам расстрэлаў і пахавання ахвяраў сталінскіх рэпрэсій. Журы ўзначаліў мастак Аляксей Марачкін. У журы і аргкамітэт увайшлі вядомыя прадстаўнікі беларускай творчай і навуковай інтэлігенцыі. Намеснікамі старшыні журы абраныя акадэмік Радзім Гарэцкі і паэт Анатоль Вярцінскі.

"Зараз нашая задача распаўсюдзіць умовы конкурса сярод патэнцыйных удзельнікаў. Гэта значыць, сярод насельніцтва Беларусі, сярод грамадзянаў Беларусі. У першую чаргу, сярод навучэнцаў і студэнтаў мастацкіх школ, коледжаў і ВНУ. Вось гэта зараз самая галоўная задача – каб ідэя конкурса пайшла ў народ", - адзначыў старшыня аргкамітэту грамадскі дзеяч і журналіст Марат Гаравы.

Па яго  словах, праца над праектамі мемарэалізацыі Курапатаў ужо ідзе. Хаця імёны творцаў, якія працуюць над праектамі, называць яшчэ рана. Вынікі конкурсу будуць падведзены ў лістападзе гэтага году на другой дакументальна-мастацкай выставе "Праўда пра Курапаты: Факты. Дакументы. Сведчанні”, паведамляе "Радыё Рацыя".