Беларус Ivan з ваўкамі не прайшоў у фінал Еўрабачання, Джамала — у фінале

Ivan выступаў пад пятым нумарам і выконваў песьню «Help you fly», паведамляе «Радыё Свабода».

Фінал конкурсу адбудзецца ўвечары 14 траўня. У ім возьмуць удзел прадстаўнікі 26 краінаў: краіны так званай «Вялікай пяцёркі», якія стаялі ля вытокаў конкурсу (Вялікабрытанія, ФРГ, Іспанія, Італія, Францыя), Швецыя як гаспадар конкурсу і па 10 краінаў, адабраных у двух паўфіналах.

У першым паўфінале, які адбыўся 10 траўня, у дзясятку лепшых увайшлі ўдзельнікі з Аўстрыі, Азербайджану, Арменіі, Венгрыі, Нідэрландаў, Кіпра, Мальты, Расеі, Харватыі і Чэхіі. У другім паўфінале кваліфікацыю пераадолелі выканаўцы з Латвіі, Грузіі, Балгарыі, Аўстраліі, Украіны, Сербіі, Польшчы, Ізраілю, Літвы і Бельгіі.

Букмекеры ў гэтым годзе прадказваюць перамогу ў «Еўрабачанні» Сяргею Лазараву з Расеі, другое месца аддаюць Джамале, украінцы крымска-татарскага походжання, якая пяе песню пра дэпартацыю яе народу з Крыму ў 1944-м, на трэцім месцы ў рэйтынгу ідзе выканаўца Амір з Францыі.