КЗ «Мінск» адмовіўся даваць залю для канцэрту памяці Ганны Вольскай

Канцэрт памяці Ганны Вольскай было вырашана зладзіць менавіта ў КЗ «Мінск», бо з гэтай пляцоўкай звязана шмат успамінаў. Менавіта тут Ганна ладзіла прэзентацыю альбома «Тры чарапахі» гурту N.R.M. і маштабнае шоў-прэзентацыю альбому «Каралі раёну» праекту «Крамбамбуля». Канцэрт меркавалася правесці ў акустычным фармаце пры ўдзеле сяброў і калегаў сям’і Вольскіх. Але справа не дайшла нават да падачы на гастрольнае пасведчанне.

«Калі толькі мы загаварылі пра гэтую ідэю, Лявон выказаў меркаванне, што дазволу не дадуць. А мне здавалася, што памяць пра чалавека – гэта святое. Але я памыліўся. Нам адмовілі ў здачы залі ў арэнду», – паведаміў Tuzin.fm арганізатар канцэрту Ўладзімір Шаблінскі. Ён кажа, што спачатку кіраўніцтва КЗ «Мінск» сказала, што заяўленая дата 7 ліпеня ў іх вольная, але папрасіла час на «кансультацыю» з той нагоды, ці здаваць залю, потым прасілі спіс выступоўцаў, а пасля адмовілі. На той падставе, што ў гэтыя дні будзе праведзенае «дзяржаўнае мерапрыемства з удзелам органаў дзяржаўнай улады, сілавых міністэрстваў і ведамстваў».

Іншую дату ды іншае месца арганізатары канцэрту памяці Ганны Вольскай ня будуць выбіраць. «Абсалютна разумею рэакцыю Лявона, які сказаў, што ў гэтай краіне ня будзе рабіць ніякіх канцэртаў. Шукаць іншыя магчымасці зладзіць канцэрт тут я не бачу сэнсу, бо калі дадуць залю, то адмовяць у гастрольцы, а калі дадуць гастрольку і пойдзе рэклама, дык пацячэ этыленгліколь ці яшчэ што. Думаю, нават на хутары не далі бы зрабіць канцэрт. Мне вельмі непрыемна і балюча гэта ўсведамляць, але так яно і ёсць», – зазначыў Шаблінскі.

Папярэдняя спроба зладзіць канцэрт з удзелам Вольскага на хутары Арлоўшчына на Масленіцу таксама была безвыніковай.