Беларуская партыя левых «Справядлівы свет» патрабуе вярнуць ільготы ліквідатарам аварыі на ЧАЭС

Беларуская партыя левых «Справядлівы свет» патрабуе ад уладаў прыняцця новага закона аб сацыяльнай абароне ліквідатараў аварыі на Чарнобыльскай АЭС і грамадзян, якія пражываюць на пацярпелых тэрыторыях, гаворыцца ў заяве, прынятай 23 красавіка на пасяджэнні бюро цэнтральнага камітэта партыі.

Гэты закон, лічаць у арганізацыі, павінен прадугледжваць у тым ліку «вяртанне ліквідатарам ўсіх адабраных ільготаў і сацыяльных гарантый», паведамляе БелаПАН.

Акрамя таго, партыя заклікае ўлады прыняць «доўгатэрміновую комплексную праграму па аднаўленні інфраструктуры і сацыяльнай сферы рэгіёнаў, пацярпелых ад выбуху на Чарнобыльскай АЭС, вырашэння назапашаных там праблем».

У заяве адзначаецца: пасля аварыі «з высокіх дзяржаўных трыбун рабіліся заявы аб тым, што пацярпелыя тэрыторыі будуць цалкам адноўлены і людзям, якія пражываюць на іх, будзе забяспечаны ўзровень жыцця, супастаўны з самымі заможнымі краінамі свету». «Аднак праз 30 гадоў неабходна канстатаваць, што ўзровень жыцця ў большасці пацярпелых раёнах знізіўся. Беспрацоўе, заняпад эканомікі, нізкі ўзровень медыцынскага абслугоўвання і сацыяльнай абароны, абыякавасць ўлады - такая сённяшняя рэальнасць для людзей, апаленых Чарнобылем», - гаворыцца ў дакуменце.

«Першы ўдар на сябе прынялі ліквідатары аварыі. Менавіта яны прыйшлі на дапамогу людзям, якія апынуліся ў бядзе. Аднак праз 25 гадоў у беларускіх ліквідатараў указам прэзідэнта адабралі ўсе сацыяльныя льготы. Дзяржава практычна забылася на тых, хто, рызыкуючы жыццём і здароўем, браў удзел у ліквідацыі наступстваў ядзернага выбуху. Неабходна адзначыць, што нашы суседзі, Расія і Украіна, якія менш пацярпелі ад наступстваў Чарнобыля, тым не менш захавалі ліквідатарам ўсе льготы», - абгрунтоўвае партыя свае прапановы.