Гербу Магілёва вярнулі Пагоню

Раней у прадпрыемстве «Магілёўсвятло» заяўлялі, што Пагоню ў гарадскі герб уштукаваць тэхнічна немагчыма, піша "Радыё Свабода".

Неўзабаве пасля публікацыяў у незалежных медыя пра тое, што герб Магілёва без Пагоні парушае не толькі афіцыйнае апісанне гарадскога сімвала, але і ўказ Аляксандра Лукашэнкі, якім кіраўнік дзяржавы зацвердзіў гэтае апісанне, Пагоню вярнулі магілёўскаму гербу.

У старым варыянце ўпрыгожвання замест Пагоні была адтуліна.

Цяперашні герб горада гістарычны. У 1661 годзе Магілёву яго надаў кароль Рэчы Паспалітай і вялікі князь літоўскі Ян Казімір Ваза. Тады гораду вярнулі Магдэбурскае права, якога пазбавілі ў 1654 годзе, калі гараджане ўпусілі ў горад маскоўцаў, што прыйшлі вайной на беларускія землі. 1 лютага 1661 года магілёўцы паўсталі і перабілі маскоўскі гарнізон. Гораду вярнулі Магдэбурскае права і надалі новы герб з Пагоняй.