За тыдзень да гадавіны Чарнобыля ў Мінску пройдзе «Атамэкспа»

У Нацыянальным выстававым цэнтры «Белэкспа» 19-21 красавіка пройдзе VII міжнародная выстава і канферэнцыя «Атамэкспа». Мерапрыемства ладзіцца з ініцыятывы беларускага Мінэнэрга і пры падтрымцы расейскай дзяржкарпарацыі «Расатам».

На выставе абяцаюць прадэманстраваць найноўшыя тэхналогіі праектавання, будаўніцтва, выкарыстання і бяспекі атамных электрастанцыяў, забяспечыць эфектыўныя пастаўкі абсталявання Беларускай АЭС, судзейнічаць падрыхтоўцы кадраў і забесьпячэнню ядзерным палівам. У дзень адкрыцця выставы пройдзе круглы стол на тэму «Грамадская прымальнасць атамнай энэргетыкі».

У вітанні ўдзельнікам канферэнцыі гендырэктар «Росатома» Сяргей Кірыенка называе Беларускую АЭС, якую будуюць па расейскіх тэхналогіях, «узорным аб’ектам», паведамляе «Радыё Свабода».

«Будаўніцтва першай атамнай станцыі ў Рэспубліцы Беларусь шмат у чым вызначае яе энэргетычную незалежнасць і стане магутным стымулам для развіцця беларускай эканомікі», — піша ён.

Тым часам супраць будаўніцтва АЭС пратэстуе Літва: прэзідэнт Даля Грыбаўскайце прапаноўвала абмежаваць экспарт электрычнасці з Беларусі ў сувязі з «паспешлівым будаўніцтвам» АЭС, таксама афіцыйная Вільня абвінавачвае Мінск у невыкананні абяцанняў па АЭС, што да адказаў на пытаньні пра бяспеку. Спыніць будаўніцтва БелАЭС заклікалі і эколагі розных краінаў — якраз на нядаўнюю гадавіну аварыі на «Фукусіме». Беларускія эколагі таксама выступаюць супраць будаўніцтва АЭС ад самага пачатку.