У Мінску будуць судзіць добраахвотніка «Правага сектару»

У Фрунзенскім судзе Мінску 20 красавіка пачнуць судзіць жыхара Наваполацку Тараса Аватарава, добраахвотніка «Правага сектару», якога затрымалі ў лістападзе 2015 году на чыгуначным вакзале ў Мінску пасьля прыезду з Украіны.

Паводле звестак Следчага камітэту, у рэчах затрыманага была самаробная граната і пісталет «Макарава». Пра асобу затрыманага адпачатку СК паведамляў, што яму 26 гадоў, раней вучыўся ў Полацкім універсітэце, паведамляе "Радыё Свабода".

Тараса Аватарава будуць судзіць паводле двух артыкулаў Крымінальнага кодэксу - кантрабанда зброі і незаконны абарот зброі. Яму пагражае да 8 гадоў зняволення.

Між тым у прадстаўнікоў «Правага сектару», да якіх беларускія журналісты звярнуліся па каментар пасьля затрымання Тараса Аватарава, узніклі сумненні адносна зброі, якую ён нібыта правёз праз мяжу з Украінай.

«Калі шчыра, фатаздымкі зброі, якую ў яго нібыта канфіскавалі, вельмі здзіўляюць. Пісталет Макарава тут рэдкасьць. На чорным рынку ён каштуе больш за 1000 долараў. А штука баксаў — дурныя грошы! АКС-74, напрыклад, каштуе ад 300 да 700 баксаў. Мы лічым, што яго маглі ўзяць „голым“, але з дакументамі. А іншае да справы ўжо прыклалі», — падзяліўся з Еўрарадыё сваім разважаннямі адзін з байцоў «Правага сектару».

Назіральнікі заўважаюць, што Тарасу Аватараву не інкрымінуецца артыкул аб наёмніцтве, паводле якога, як паведамлялі беларускія праваахоўнікі, былі заведзеныя дзясяткі крымінальных спраў на беларусаў, якія на розных баках удзельнічалі ў ваенным канфлікце ва Ўкраіне.