Дачка генерала Андэрса наведала магілы сталінскіх ахвяр у Курапатах

Упаўнаважаная кіраўніка Рады міністраў Польшчы па справах міжнароднага дыялогу Анна Марыя Андэрс у суботу ўшанавала памяць тысячы ахвяр сталінскіх рэпрэсій у Курапатах пад Мінскам.

Андэрс разам з польскім амбасадарам у Беларусі Конрадам Паўлікам спачатку ўсклалі вянкі і запалілі свечкі ля крыжа ў памяць забітых палякаў, прачыталі малітву. Затым усклалі кветкі каля трох крыжоў, прысьвечаных усім ахвярам сталінскіх рэпрэсій, паведамляе "Польскае радыё". Ва ўрачыстасці прынялі ўдзел прадстаўнікі польскай меншасці ў Беларусі й польскія дыпламаты.

З Беларусі Анна Марыя Андэрс адправілася ў Расію, дзе сёння яна ўзначальвае дзяржаўную дэлегацыю, якая ў Катыні і Смаленску прымае ўдзел ва ўрачыстасцях 76 угодак катынскага злачынства і 6-й гадавіны смаленскай авіякатастрофы.

- Катынь мне вельмі блізкая. Мой бацька чакаў на гэтых афіцэраў, – зазначыла дачка генерала Ўладыслава Андэрса й падкрэсліла, што адной з мэтаў яго жыцця было даведацца, што з імі здарылася.

Звяртаючыся да смаленскай трагедыі, Андэрс сказала, што яна ведала асабіста прэзідэнта Леха Качыньскага і яго жонку, а таксама апошняга прэзідэнта Польшчы ў выгнанні Рышарда Качароўскага.

Гісторыкі падлічылі, што магілы ў Курапатах утрымліваюць рэшткі ад 30 да 250 тысяч ахвяр савецкіх рэпрэсій 1937-1941 гг., у тым ліку палякаў. Да гэтага часу было праведзена вельмі мала эксгумацый.

Па словах польскіх і беларускіх незалежных гісторыкаў, у Курапатах, верагодна, адно з месцаў пахавання ахвяр Катыні, і менавіта там, трэба было б пабудаваць апошнія катынскія могілкі.