На будоўлі Астравецкай АЭС ужо загінулі 9 чалавек

Вядома, што некаторыя працы, звязаныя з лініяй электраперадач, выконваюць кітайцы. Пераважна тут працуюць гарадзенскія будаўнікі, якія “вахценым” спосабам працягваюць падтрымліваць тэмпы будоўлі.

"Я не ведаю, што там са службамі аховы бяспекі, але факты рэч упартая. 9 такіх выпадкаў, што людзі гінулі на гэтай будоўлі. Гэта ўсё хаваецца. Але гэта факты. Што тычыцца тэхнікі бяспекі, хто яго ведае, як яна там адбываецца на самой справе, будоўля вялікая. Людзі мяняюцца часта. Безумоўна там гэта будзе не на належным узроўні" - распавёў "Радыё Рацыя" грамадскі актывіст з Варнянаў Астравецкага раёну Мікалай Уласевіч.

Паводле інфармацыі Мікалая Уласевіча, на будаўніцтве атамнай станцыі мясцовых жыхароў задзейнічана няшмат. Таксама заўважаецца істотны адток працоўных: калі раней заробкі тут складалі 10-12 мільёнаў, то цяпер многія атрымліваюць усяго па 2,5 мільёны.