Мінкульт адмовіў палове прэтэндэнтаў на статус "творчага працаўніка". Цяпер яны «дармаеды»

Усім прэтэндэнтам на статус творчага працаўніка - а гэты статус пазбаўляе ад неабходнасці плаціць так званы «падатак на дармаедства» ў памеры 20 базавых велічынь — Міністэрства культуры нагадвае: калі за прэтэндэнта не паручыцца які творчы саюз, вагу будзе мець толькі прафесiйны сертыфiкат, выдадзены адмысловай экспэртнай камісіяй.

Фармальна дэкрэт «аб дармаедзтве» не закрануў творчых працаўнікоў. Аднак не плаціць падатак на фінансаваньне дзяржаўных выдаткаў можна толькі тым, хто ў творчым саюзе. Іншы варыянт - атрымаць прафесійны сертыфікат, паведамляе "Радыё Свабода".

Згодна з апублікаванай на сайце ведамства інфармацыяй, ад канца ліпеня мінулага году адбылося 10 пасяджэнняў камісіі па пацвярджэнні статусу творчага працаўніка. Разгледжана блізу паўсотні заяваў, з якіх задаволена толькі палова - такім чынам, толькі 26 кандыдатаў атрымалі адпаведны сэртыфікат. Астатнім параілі або спыніць далейшыя спробы, або ўдасканаліць сваё майстэрства.

Сярод забракаваных больш як двух дзясяткаў кандыдатаў - і малады мінскі мастак Вячаслаў Кліменка. Зрэшты, як кажа ён сам, чальцоў камісіі найменей цікавілі ягоныя працы. Эксперты чакалі справаздачы па колькасьці пэрсанальных выставаў і ўзнагародаў - а такімі рэчамі не заўсёды могуць пахваліцца нават спрактыкаваныя майстры.

Праігнараваўшы той факт, што Вячаслаў меў стыпендыю прэзідэнцкага фонду па падтрымцы таленавітай моладзі, яму параілі паступіць у Акадэмію мастацтваў і праз год паспрабаваць шчасця наноў:

«Не хачу цяпер зводзіць усё да нейкага высвятлення адносінаў, але ў мяне праз два тыдні, 22 красавіка, у галерэі TUT.by распачнецца персанальная выстава, якой я хацеў бы прадэманстраваць на практыцы: вось вынікі маёй дзейнасці, якую эксперты не лічаць за нешта вартае. Думаю, што гэта будзе добрай падставай паразважаць, наколькі цывілізаваныя падыходы ў Беларусі да ацэнкі здольнасцяў творчых людзей», - гаворыць Васіль Кліменка.

Як вынікае з палажэння аб сертыфікаце творчага работніка, галоўныя патрабаванні да прэтэндэнта наступныя:

- вынікі творчай дзейнасці павінны быць новымі, якія не існавалі раней, з'яўляцца самастойнымі праявамі інтэлектуальных намаганняў;

- адносіцца да твораў літаратуры і мастацтва, іншых высілкаў у галіне культуры, мастацтва і культурнай творчай дзейнасці;

- павінны адпавядаць прафесійнаму мастацкаму ўзроўню вынікаў творчай дзейнасці;

- апублікаванне, выкананне, паказ, давядзенне да ўсеагульнага ведама спосабамі, якія робяць вынікі творчай дзейнасці даступнымі публіцы - не меней за два разы на год цягам апошніх трох гадоў;

- наяўнасць дзяржаўных узнагародаў, званняў ляўрэата, дыпламанта міжнародных, рэспубліканскіх, рэгіянальных культурных мерапрыемстваў і іншых заахвочванняў за творчую дзейнасць цягам апошніх трох гадоў.

У Міністэрстве культуры ўдакладняюць, што сертыфікат творчага працаўніка выдаецца бясплатна і дзейнічае пяць гадоў. Потым працэдуру давядзецца паўтарыць.