У Мінску на Дзень Волі прыйшло больш за тысячу чалавек (ФОТА)

Агулам у святкаванні Дня Волі ў Мінску прынялі ўдзел больш за тысячу чалавек, паведамляе "Наша Ніва". Было два эпіцэнтры вулічнай акцыі. Мікола Статкевіч, Павел Севярынец, Анатоль Лябедзька, Уладзімір Някляеў і Вячаслаў Сіўчык прыйшлі да помніка Янку Купалу, што ў парку насупраць цырку, пасля ўскладання кветак, яны прайшлі шэсцем да Акадэміі навук. У ім брала ўдзел каля 700 чалавек. Было шмат сцягоў, а таксама крэатыўных плакатаў. Частка ж людзей прыйшлі адразу на дазволеную ўладамі пляцоўку – каля кінатэатра «Кастрычнік». А адтуль прайшлася да ўніверсаму «Рыга». Але адмовіліся ісці на плошчу Бангалор.

Сілавікі ніяк не заміналі ў правядзенні вулічнай акцыі.

Сёлета ўдзельнікам спрыяла яшчэ надвор’е. Быў ясны, сонечны вясновы вечар. Праз гэта ва ўдзельнікаў быў добры настрой. Людзі шмат спявалі, асабліва хіты «Ляпіса Трубяцкога». Увогуле, у параўнанні з акцыямі апошніх гадоў, сёлетняе святкаванне Дня Волі атрымаўся надзвычай шматлюдным, святочным і жывым.

Можна сказаць, што гэтым разам на акцыі было нямнога лозунгаў і размоваў пра палітыку. Гэта было найперш святкаваннем, а не акцыяй пратэсту.

Акцыя расцягнулася па часе амаль на тры гадзіны.