Украінскага музыку не пусцілі ў Беларусь, бо яму забаронены ўезд у Расію?

18 сакавіка Сяргей Мартынюк кіраваўся з Луцку ў Брэст, дзе меўся даць канцэрт у межах туру свайго сольнага праекту «Піаноакустика», але беларускія памежнікі адмовілі ўкраінскаму музыканту ва ўездзе ў краіну. «Супрацоўнікі беларускай мытні патлумачылі, што забарона на ўезд дзейнічае ў сувязі з адпаведным рашэннем Расейскай Федэрацыі, якая пашыраецца і на тэрыторыі Беларусі», – напісаў Сяргей у афіцыйнай суполцы гурту. Запланаваныя канцэрты ў Брэсце, Мінску ды Віцебску давялося адмяніць.

«Сяргея проста ссадзілі з рэйсавага аўтобусу на мяжы і сказалі, што забарона на ягоны ўезд распаўсюджваецца на ўсе краіны Мытнага саюзу, – распавёў Tuzin.fm арганізатар канцэрту Сяргея Мартынюка ў Брэсце Зміцер Назараў. – Я адразу ж патэлефанаваў у Памежны камітэт, але там мне адно толькі параілі шукаць ініцыятара забароны. Звярнуўся ў аддзел па міграцыі, там сказалі, што інфармацыяй, датычнай гэтай асобы, не валодаюць. Відавочна, што ў беларусаў прэтэнзій да яго няма, ён праходзіць па спісах ад Расіі. Цяпер будзем рабіць запыты ва ўкраінскае консульства, каб дапамагчымся скасавання забароны, бо тут церпяць беларуска-ўкраінскія сувязі». Усе квіткі на сённяшні канцэрт украінскага музыка ў Брэсце былі прададзеныя. Арганізатары выступу пацярпелі фінансавыя страты, цяпер яны будуць вымушаны вяртаць грошы за квіткі.

«Не бяруся сказаць за што дакладна мяне занеслі ў гэты спіс – можа за Майдан, можа за“Бандэрштат”, можа за песні, прысвечаныя ўкраінскім жаўнерам», – зазначыў у каментары для Tuzin.fm Сяргей Мартынюк.