Бастунец узяў удзел у «Клубе рэдактараў»

Яна з’явіцца ў эфіры ў нядзелю пасля праграмы «Галоўны эфір».

Андрэй Бастунец гаворыць, што перадача будавалася на такіх сюжэтах тыдня, як паседжанне дзяржсавета саюзнай дзяржавы ў Мінску і справа арыштаванага ва Украіне беларуса Васіля Парфянкова, аднак шмат увагі было прысвечана і праблемам журналісцкага асяродку. У тым ліку збіццю журналіста tut.by Паўла Дабравольскага.

«Я б сказаў, што Генадзь Давыдзька і Павел Якубовіч больш слухалі, чым гаварылі. Ніякіх агрэсіўных выпадаў не было, ніхто не называў незалежную прэсу антыдзяржаўнай. Я б увогуле адзначыў, што суразмоўцы ўвесь час падкрэслівалі важнасць дыялогу», — адзначыў Андрэй Бастунец.

Размоваў пра тое, ці ў «Клуб рэдактараў» будуць стала запрашаць кагосьці з недзяржаўных СМІ, ці гэта разавая акцыя, не было, піша "Наша Ніва".

Нагадаем, 12 лютага група журналістаў накіравала на адрас старшыні Белтэлерадыёкампаніі Генадзя Давыдзькі ліст з просьбай даць ім магчымасць выказацца ў “Клубе рэдактараў” з нагоды збіцця журналіста Паўла Дабравольскага. Першае запрашэнне паступіла на мінулым тыдні, за дзень да прызначанага запісу, калі Бастунец быў за межамі Беларусі. Ён вымушаны быў адмовіцца, запэўніўшы, што гатовы ўдзельнічаць у адной з наступных перадач.

Па звестках прэс-службы “БАЖ”, акрамя Андрэя Бастунца, ніхто з падпісантаў запрашэння на запіс 26 лютага не атрымліваў.