Шумчанка і Статкевіч падалі заяўку на Марш прадпрымальнікаў 14 сакавіка

Шэсце мае сабрацца ля Акадэміі навук а 13-й гадзіне, прайсці па вуліцы Сурганава да парку Дружбы народаў. Пасля запланаваны мітынг у парку, ён мае пачацца а 14:30 і завершыцца а 16-й гадзіне, паведамляе Радыё Свабода.

Мітынг мае пачацца а 13-й гадзіне, завершыцца а 16-й. Меркаваная колькасць удзельнікаў, гаворыцца ў заяве на правядзенне мітынгу, — 1000 чалавек. Мэта шэсця — «абарона правоў і законных інтарэсаў індывідуальных прадпрымальнікаў». Калі заяву не задаволяць і шэсце не дазволяць, кажуць ініцыятары, 25 сакавіка людзі пойдуць у любое месца ў цэнтры Мінска і правядуць там несанкцыянаваную акцыю.

Раней «Перспектыва» планавала зладзіць мітынг у парку Дружбы народаў 15 лютага, але заяву на мітынг адклікалі яшчэ да разгляду. Як тлумачыў Шумчанка, тады ўлады паставілі ўмову: або перамовы ўладаў з прадстаўнікамі прадпрымальнікаў, або мітынг.

Перамовы адносна ўказу № 222, прынамсі з пункту гледжання «Перспектывы», зайшлі ў тупік: Шумчанка раней заяўляў, што працоўная група «забыла пра пытанні ІП».

Тым часам у Мінску ўжо двойчы, 14 лютага і 22 лютага, прайшлі несанкцыянаваныя акцыі прадпрымальнікаў на Кастрычніцкай плошчы. Абедзьве абышліся без затрыманняў, хоць апошні раз у ролі «цітушак»выступілі супрацоўнікі камунальных служб. На акцыях прысутнічаў Статкевіч, Шумчанкі не было. На наступную несанкцыянаваную акцыю на Кастрычніцкай заклікалі прыходзіць у нядзелю, 28 лютага, а 15-й гадзіне.