Статкевіч заклікаў пачаць акцыю пратэсту ў панядзелак з прыёмнай Адміністрацыі прэзідэнта

"Цяпер ужо відавочна, што рэжым будзе вырашаць створаныя ім эканамічныя праблемы выключна за кошт простых беларусаў. Спроба ліквідацыі ІП, абмежаванні на атрыманне з-за мяжы танных і якасных тавараў, усё новыя падаткі, рэзкі рост паслуг ЖКГ - гэта яшчэ толькі пачатак рабаўніцтва народа. Вынаходзяцца ўсё новыя спосабы забраць у беларусаў іхнія ўсё больш танныя рублі. Дайшлі да таго, што прымушаюць людзей саміх пісаць заявы з "просьбай", каб ім паменшылі заробкі. І тыя пішуць", - адзначае былы палітвязень.

«У панядзелак 22 лютага а 12-й гадзіне на Кастрычніцкай плошчы ў Мінску адбудзецца чарговы мітынг у падтрымку ІП. Падтрымоўваю гэты мітынг, але прапаную перад яго пачаткам прыйсці да прыёмнай Адміністрацыі прэзідэнта і прынесці з сабой заявы з патрабаваннем адмены ўказа 222, адмовы ад абмежаванняў на атрыманне і асабісты ўвоз рэчаў з-за мяжы, зніжэння цэнаў паслуг ЖКГ. Заявы можна і не аддаваць, але варта прыйсці адначасова, каб самым фактам нашага масавага прыходу мы маглі паказаць нашую нязгоду са спробай улады за наш кошт ліквідаваць наступствы свайго бязглуздага кіравання эканомікай», — заклікае Мікалай Статкевіч. 

«Гэта вашае законнае права прыходзіць у тую прыёмную са сваімі пісьмовымі ці вуснымі патрабаваннямі. Для таго ж тая прыёмная і існуе. Ніякіх дазволаў для гэтага не патрабуецца», — тлумачыць Статкевіч.

Першая публічная акцыя пратэсту прадпрымальнікаў адбылася ў мінулы панядзелак 15 лютага.

Пратэстоўцы патрабуюць як адмены ўказа 222, так і змены палітычнага і эканамічнага курсу краіны.

Прадпрымальнікаў падтрымалі лідары апазіцыі Анатоль Лябедзька, Мікалай Статкевіч, Уладзімір Някляеў, Павел Севярынец. 

Таццяна Караткевіч і Анатоль Шумчанка да акцыі 15 лютага не далучыліся, піша "Наша Ніва".

«Хто не баіцца, прыходзьце — я там буду», — падкрэсліў Мікалай Статкевіч.