Гомельская прадпрымальніца: Будзем стаяць на плошчы і патрабаваць імпічменту!

Запрашэнне атрымалі ўсе зацікаўленыя ведамствы краіны. Калі ж улады спробу дыялогу праігнаруюць, прадпрымальнікі абяцаць выставіць ужо больш радыкальныя патрабаванні.

У чацвер, 28 студзеня, некалькі соцень прадпрымальнікаў хадзілі маршам да аблвыканкаму ў Віцебску, 29 студзеня прыйшла пара на іхных гомельскіх паплечнікаў. З пустых рынкаў больш за 300 бізнесоўцаў рушылі да мясцовага аблвыканкаму, паведамляе "Белсат". Як дагэтуль канкрэтных сустрэчных прапановаў ад уладаў не было, што ж будзе, калі стаўленне не зменіцца?

«Мы, калі нас не пачуюць, будзем хадзіць сюды штодня і крычаць! І ўдзень і ўначы змушаць іх, каб нас пачулі. І ў Менску будзем крычаць, каб нас пачулі, хутка і лозунгі пойдуць – будзем крычаць: «Імпічмент!» - гаворыць індывідуальная прадпрымальніца Ларыса Кавалева.

Не чакаючы на такія лозунгі, да прадпрымальнікаў выйшлі мясцовыя чыноўнікі. Як прызнаюць, указ № 222 – не ідэальны, але пратэставаць сэнсу няма, маўляў, іншыя ж неяк працуюць.

Пад канец мінулага году па рынках краіны пракацілася хваля распродажаў, прадпрымальнікі спяшаліся пазбыцца тавару, які яны не проста не змогуць прадаць, згодна з указам № 222, але могуць атрымаць штраф ды пазбавіцца прадукцыі. Рэкордна нізкія кошты змяніліся пустымі гандлёвымі пляцоўкамі, а ўлады, здаецца, і не заўважалі праблемы.

У выніку толькі за апошні тыдзень пратэсты ды масавыя сходы прадпрымальнікаў пракаціліся па ўсёй краіне – ад Горадні да Горак, і ад Берасця да Віцебску. Ужо ў найбліжэйшы панядзелак у сталічным гатэлі «Пекін» грамадскае абʼяднанне «Перспектыва» склікае форум прадпрымальнікаў.

Паводле індывідуальных прадпрымальнікаў, сітуацыя выглядае так, нібыта буйны бізнес прыняў рашэнне за дробны. Таму запрашэнні на форум выслалі таксама ў Адміністрацыю прэзідэнта, айчынным чыноўнікам, амбасадарам краінаў Еўразвязу, ЗША і Расіі. На сёння, акрамя прадпрымальнікаў, на сустрэчу збіраюцца прыйсці дыпламаты Францыі, Нямеччыны ды ЗША.