У Мінску праходзіць суд па справе аб патрыятычных графіці

У жніўні 2015 года яны напісалі на будынках горада і на плоце графіці «Беларусь мае быць беларускай» і «Рэвалюцыя свядомасці, яна ўжо ідзе…», а таксама замалявалі сацыяльную рэкламу з выявай супрацоўніка міліцыі.

У судзе Фрунзенскага раёна Мінска 25 студзеня ў 11 гадзін пачаўся разгляд крымінальнай справы аб патрыятычных графіці. 

Некалькі дзён таму стала вядома, што адзін з фігурантаў справы Вадзім Жаромскі патрапіў у шпіталь у Смаргоні. 16 студзеня да яго наведаўся ў шпіталь прадстаўнік міліцыі, каб уручыць позву ў суд пад подпіс. У пяініцу яго тэрмінова выпісалі, каб ён змог патрапіць на суд.

Праваабарончы цэнтр «Вясна», які ўважліва адсочвае крымінальную справу ў дачыненні да юнакоў, у жніўні выступіў з заявай, у якой заклікаў спыніць крымінальны перасьлед актывістаў. Праваабаронцы адзначылі, што калі фігурантаў справы асудзяць паводле артыкула 339 Крымінальнага кодэксу, іх прызнаюць палітвязнямі.

Пад час следства дзеянні актывістаў былі перакваліфікаваныя, а адзін з юнакоў Яраслаў Ульяненкаў зараз выступае ў якасці сведкі, з яго былі знятыя ранейшыя абвінавачванні.

Нагадаем, 11 жніўня пяцёра хлопцаў (арыштаваныя былі трое, двух адпусцілі) былі жорстка затрыманыя па падазрэнні ва ўдзеле па трох крымінальных справах: нанясенню беларуска-моўных графіці «Беларусь мае быць беларускай» і «Рэвалюцыя свядомасці, яна ўжо ідзе…», а таксама запэцкаванню фарбай сацыяльнага бігборда з выявамі супрацоўнікаў міліцыі.