У цэнтры Мінска прайшла акцыя салідарнасці з прадпрымальнікамі

Да Чырвонага касцёла прыйшлі каля 30 чалавек — індывідуальныя прадпрымальнікі і апазіцыянеры на чале з лідарам Аб'яднанай грамадзянскай партыі Анатолем Лябедзькам. 

Пасля кароткага мітынгу група ўдзельнікаў акцыі пайшла ў Дом ураду, каб перадаць 11 прапановаў для развязання сітуацыі з ІП. У Доме ўраду прынялі зварот і паабяцалі, што праз 15 дзён на яго адкажуць.

Зварот у Лябедзькі, па яго словах, прынялі вельмі ветліва. “Але каб нас тут у наступны раз было значна больш людзей, яны яшчэ больш ветлівымі былі б. Гэта ўсё залежыць ад вас. Галоўнае — ведаць, якая наша мэта, якая наша задача. Наша задача — як мінімум, змяніць эканамічную стратэгію, дабіцца свабодных, сумленных выбараў. Каб тут, у будынку Дома урада сярод дэпутатаў сядзелі ў тым ліку і людзі з малога і сярэдняга бізнесу”, — сказаў ён.

Нагадаем, з 1 студзеня індывідуальныя прадпрымальнікі ў Беларусі павінны прадаваць тавары з сертыфікатамі. Пры іх адсутнасці прадпрымальнікаў чакаюць штрафы. Праз гэта значная частка ІП спыніла працу, паведамляе “Еўрарадыё”.