Жыхары Мінска абураны СМС з заклікам Мінгарвыканкама прыбіраць снег

"Пераканаўча просім прыбраць снег каля машынамесцаў і ў дварах", — СМС з такім тэкстам масава прыходзіць мінчукам на іх мабільныя тэлефоны. З просьбай зрабіць адпаведную рассылку ўлады звярнуліся да мабільных аператараў.

"Мы звярнуліся па дапамогу да мабільных аператараў. Хочацца, каб людзі дапамаглі камунальным службам. Хаця б прыбралі свае машынамесцы і двары. Але ж гэта справа дабраахвотная. Бо ўжо званяць раз'юшаныя грамадзяне", - паведаміла “Еўрарадыё” супрацоўніца Мінгарвыканкама.

Абураныя грамадзяне таксама пачалі тэлефанаваць на нумар 101, з якога нібыта былі дасланыя СМС. Мінскае упраўленне МНС просіць не тэлефанаваць на гэты нумар, бо гэта займае лінію і перашкаджае прымаць рэальныя выклікі ратавальнікаў.

12 студзеня на Беларусь абрынуўся цыклон "Даніэла", які прынёс моцныя снегапады. Метэаролагі заяўляюць, што "Даніэла" пабіла ўсе апошнія рэкорды і стала самым вялікім снегападам, які быў у Беларусі.

У сацыяльных сетках таксама пачалі абурацца і жартаваць з такіх СМС. Маўляў, спачатку на выбары запрашалі, цяпер снег просяць прыбіраць.