З прадпрыемства "Гомельпрамбуд" звольнілі нязгодных са зніжэннем заробку

Паводле інспектара прафсаюзу РЭП Леаніда Судаленкі, працаўнікі прадпрыемства «Гомельпрамбуд» Віталь Кандрашоў і Яўген Ляўшун былі звольненыя без выканання патрабаванняў заканадаўства пасля таго, як не пагадзіліся на зніжэнне тарыфнай стаўкі на 20%.

Прадстаўнік прафсаюзу адзначыў, што звольненыя – машыністы аўтамабільных кранаў упраўлення механізацыі філіяла № 11 ААТ «Гомельпрамбуд». Працаўнікі падалі пазоў на наймальніка з патрабаваннем аднавіць іх на працы і выплаціць заробак цалкам, паведамляе Белсат са спасылкай на naviny.by.

Да 5 і 4 студзеня 2016 машыністы працавалі па бестэрміновых працоўных дагаворах.

«Звольненыя працаўнікі ўступілі ў наш незалежны прафсаюз РЭП. Я буду адстойваць іх інтарэсы ў судзе і ўпэўнены, яны будуць адноўлены на працы», – падкрэсліў Леанід Судаленка.

Юрыст дадаў, што пасля падачы пазову ў суд, наймальнік адразу ж разлічыўся з працаўнікамі, перавёўшы сумы канчатковых разлікаў на іх рахункі ў банку.