ТБМ прапануе перайменаваць праспект Дзяржынскага ў вуліцу Касцюшкі

"У гэтым годзе 4 лютага споўніцца 270 гадоў з дня народзін нашага славутага земляка Тадэвуша Касцюшкі, імя якога шануюць акрамя Беларусі ў ЗША, Польшчы, Францыі і Расіі. У сувязі з гэтым просім Вас аб'явіць конкурс на выраб коннай скульптуры Касцюшкі, якую можна ўстанавіць у Мінску, а таксама на яго малой радзіме ў г. Косава Брэсцкай вобласці", - гаворыцца ў лісце, які арганізацыя даслала ў Міністэрства культуры.
Таксама на сайце ТБМ прыводзіцца зварот да старшыні Мінгарвыканкама Андрэя Шорца. У ім гаворыцца, што ў сталіцы Беларусі, краіны, дзе нарадзіўся і вырас Тадэвуш Касцюшка, вуліцы ў яго гонар пакуль што няма.

"У сувязі з гэтым ТБМ прапануе ў гэтым годзе назваць у гонар Касцюшкі адну з вялікіх і прыгожых вуліц нашай сталіцы. Існуе думка, што гэта імя можна надаць праспекту Дзяржынскага, альбо той яго частцы, якая знаходзіцца бліжэй да гістарычнага цэнтра нашай сталіцы", - прапануюць актывісты.

Андрэй Тадэвуш Банавентура Касцюшка - ваенны інжынер і ваенны дзеяч Рэчы Паспалітай, які стаў нацыянальным героем у Беларусі, Польшчы і ЗША. Удзельнік барацьбы Рэчы Паспалітай супраць Расіі і Прусіі, а таксама ўдзельнік вайны за незалежнасць ЗША. Лідар нацыянальна-вызваленчага паўстання 1794 года ў Рэчы Паспалітай супраць расійска-прускай акупацыі краіны.
Імем Касцюшкі названы вуліцы ў Санкт-Пецярбургу, Кракаве, Вільнюсе і іншых гарадах замежжа і Беларусі.