У 2016 годзе фонд «Краіна замкаў» пабудуе пад Гальшанамі ВКЛ

Праект рэалізуюць пры фінансавай падтрымцы ПРААН. Маштаб абʼектаў 1:25 (вежа Мірскага замка будзе памерам у 1 м 40 см).

Паводле праекту, у парку пабудуць дарожкі ды альтанкі. Аўтары праекту плануюць арганізаваць на хутары Радзевічы (знаходзіцца непадалёк ад будучага парку) адмысловае месца начлегу і харчавання для турыстаў, паведамляе Белсат.

«Падобныя паркі, здаецца, ёсць у кожнай краіне, толькі ў Беларусі пакуль такога не было, – распавядае кіраўнік фонду «Краіна замкаў» Алесь Варыкіш. – Мы ліквідуем гэты недахоп. Я перакананы ў поспеху. Няма сумневаў, што людзі да нас паедуць. Гэта ж будзе першы падобны абʼект у краіне.

Памятаю, некалькі гадоў таму нешта падобнае спрабавалі зрабіць на Чыжоўскім вадасховішчы ў Менску – абвясцілі, што пабудуюць тэматычны парк «Беларусь у мініяцюры». Але потым палічылі, што акупіць такі парк можна будзе толькі за некалькі дзясяткаў гадоў. У выніку плюнулі і прызналі будаўніцтва нерэнтабельным. У прыватнікаў і дзяржструктураў абсалютна розныя падыходы да падобных праектаў. Я б будаваў гэты парк, нават калі б ПРААН не выдзеліла грант. Але я вельмі рады, што ў нас ёсць такі партнёр і што ён нам паставіў жорсткія тэрміны. 10 абʼектаў зʼявяцца яшчэ да жніўня 2016 года. У нас ужо ёсць архітэктар, які праектуе, і будаўнікі, якія пабудуюць замкі».

Паводле плану, пад Гальшанамі зʼявіцца мініатурны Мірскі, Навагрудскі, Лідскі,Крэўскі, Віленскі, Тракайскі, Медніцкі замкі.

«Парк мініяцюраў»- гэта не РБ, а Вялікае княства Літоўскае», – кажа Алесь Варыкіш.