У Гомелі жанчыны патрабуюць дазволу на мірныя маніфестацыі

«Мы меліся 15 лістапада прайсці калонай ад гандлёвага цэнтра „Рэчыцкі“ да гіпермаркета „Гіпа“ з лозунгамі пра эканамічны крызіс у краіне і неабходнасць правядзення эканамічных рэформаў. Аднак гарвыканкам забараніў шэсце, спаслаўшыся, як заўсёды, на невыкананне патрабаванняў закону аб правядзенні масавых мерапрыемстваў і адпаведных выканкамаўскіх рашэнняў. Адначасова мы ставілі перад судом пытанне наконт неправамернага вызначэння гарвыканкамам толькі двух месцаў для правядзення масавых мерапрыемстваў, а таксама на ўскладанне на арганізатараў мірных сходаў абавязкаў заключаць дамовы на платнай аснове з медустановай і спецаўтапрадпрыемствам па санітарнай ачыстцы горада».

Да скаргі ў суд заяўніцы прыклалі рашэнні Камітэта ААН па правах чалавека па справах гомельскіх палітыкаў Васіля Палякова і Уладзіміра Сякеркі, у якіх забароны на правядзення мірных сходаў у Гомелі былі прызнаныя на міжнародным узроўні як парушэнні правоў на такія сходы.

Аднак судздзя Віталь Маразюк не ўзяў пад увагу высновы ўплывовай міжнароднай структуры, тым самым пацвердзіўшы, што Беларусь не мае намеру карэктаваць сваю судовую практыку ў адпаведнасці з падпісанымі міжнароднымі пагадненнямі. Гарвыканкам, маўляў, меў права не даваць дазвол на вулічнае шэсце, і ён не дазволіў.

Наталля Шчукіна і Ала Раманчык будуць аспрэчваць пастанову судздзі Маразюка ў вышэйшых судовых інстанцыях і пракуратуры, а калі спатрэбіцца, то звернуцца і ў Камітэт ААН па правах чалавека, паведамляе "Радыё Свабода".