У Мінск даставілі Віфлеемскі агонь

Урачыстае ўнясенне ў архікатэдру адбылося перад вечаровай імшой у 18.30. Пры ўваходзе рэліквію агню сустракаў мітрапаліт арцыбіскуп Тадэвуш Кандрусевіч, светары і шматлікія вернікі. Пераймаючы з рук скаўтаў агонь міру, Тадэвуш Кандрусевіч падзякаваў за тое, што ахвяруючы часам і сіламі штогод дастаўляюць у Беларусь агонь з Віфлеему, каб напярэдадні свята Божага нараджэння наблізіць людзей да Хрыста. Віфлеемскі агонь быў урачыста ўнесены ў кафедральны касцёл у поўнай цемры на знак святла, якое сваім нараджэннем унёс у цемру свету сам Хрыстос, піша "Радыё Свабода".

Паводле шматгадовай традыцыі беларускія каталіцкія скаўты прынялі Віфлеемскі агонь з рук сваіх польскіх паплечнікаў на беларуска-польскім памежным пераходзе Кузніца. Затым святы агонь быў дастаўлены ў Горадню, Мінск, а затым будзе перададзены ў касцёлы ўсёй Беларусі. Гэткім чынам Віфлеемскі агонь кожны вернік зможа занесці ў свой дом, каб мець на сваім святочным стале ў свята Божага нараджэння.

Віфлеемскі агонь распачынае шлях у Гроце Нараджэння Пана ў Віфлееме, дзе гарыць вечны агонь. Ад яго штогод запальваецца адна маленькая свечка, полымя якой скаўты нясуць па ўсiм свеце. Штогод вандроўка Віфлеемскага агню праходзіць пад пэўным дэвізам.

Дэвіз сёлетняга году — «Заўваж чалавека».
ПілігрымаваннеВіфлеемскага святла міру ўпершыню было арганізаванае ў 1986 годзе ў горадзе Лінц у Аўстрыі як частка дабрачынных імпрэзаў на Божае Нараджэнне. Тады акцыя мела назву «Святло ў цемры». Пазней апеку над гэтай акцыяй узялі аўстрыйскія скаўты.