На таксіста Леаніда Кулакова склалі пратакол "за несанкцыянаваны пікет"

Леанід Кулакоў выйшаў на мінскі бульвар Талбухіна з плакатам, на якім было напісана "10 снежня — Дзень правоў чалавека. Жыццё дадзена Богам, а не катам".

"Гэтым тэкстам я хацеў падкрэсліць, што ўсе людзі роўныя і нікому не дадзена права караць іншых за іх погляды. Але пра Беларусь гэтага не скажаш. Вось нават за абарону правоў чалавека мяне збіраюцца пакараць. Чамусьці калі на дзень ВДВ у парку Чалюскінцаў, гэта насупраць месца, дзе я праводзіў пікет, гуляюць былыя дэсантнікі, іх ніхто не чапае. Я працую таксістам, але праблема правоў чалавека мне блізкая і ў гэты дзень я хацеў не толькі заявіць, што сітуацыя з правамі чалавека ў Беларусі кепская, але і павіншаваць праваабаронцаў. Але аказваецца, што гэта адміністрацыйны праступак", — зазначыў Леанід Кулакоў у камэнтары для "Радыё Свабода".

Як паведаміў актывісту ўчастковы міліцыянт, у панядзелак 21 снежня адміністрацыйная справа Леаніда Кулакова будзе перададзеная ў Першамайскі суд Мінска. Чакаецца, што суд пройдзе ў пачатку тыдня.

У 2015 годзе актывіст "Еўрапейскай Беларусі" Леанід Кулакоў удзельнічаў у некалькіх акцыях салідарнасці з беларускімі палітвязнямі. Пасля адседкі адміністрацыйнага арышту ў СІЗА Смалявіцкай міліцыі Леанід Кулакоў публічна скрытыкаваў умовы ў гэтай установе і дамогся правядзення там рамонту.