Камітэт па правах чалавека ААН прызнаў несправядлівым прысуд Паўлу Селюну, якога расстралялі

Зварот Паўла Селюна ў ААН зарэгістравалі ў 2013 годзе, калі яму ўжо быў вынесены смяротны прысуд. У тым ліку Павал Сялюн скардзіўся на катаванні падчас следства і парушэнні ягоных правоў на абарону.

Маці асуджанага на смерць былога студэнта Тамара Сялюн кажа, што яе сына збівалі, каб атрымаць патрэбныя паказанні, піша "Радыё Свабода".

"З таго, што я ведаю з дакументаў, якія пайшлі ў ААН, з яго выбівалі паказанні, якія патрэбныя следству. У тым ліку пагражалі забіць сваякоў, мяне ў прыватнасці, ды іншых людзей з нашай сям’і. Ён нават казаў, што яму ня страшна за сябе, але страшна за тых сваякоў, хто застаўся. Яшчэ яму калолі нейкія ўколы», - распавяла Тамара Сялюн.

Жанчына згадала прозвішча следчага Дзмітрыя Бірука, які, як мяркуе Тамара Сялюн, за рассьледаваньне справы яе сына мог атрымаць узнагароды.

Павал Сялюн быў асуджаны на смерць за забойства двух чалавек з асаблівай жорсткасцю, а таксама за здзек з трупаў. Прашэнне аб памілаванні, якое Павал Сялюн накіраваў Аляксандру Лукашэнку, было адхіленае.

Умовы, у якіх утрымлівалі падчас следства Паўла Селюна, а таксама абыходжанне з ім палічылі ў Камітэце па правах чалавека ААН зневажаючым ягоную чалавечую годнасць. У прыватнасці, Сялюна яшчэ да суду прымушалі перасоўвацца з апушчанай да падлогі галавой і заламанымі да гары рукамі. Такое абыходжанне варта параўнання з катаваннем, лічаць у Камітэце па правах чалавека ААН.

Паводле каардынатара грамадскай кампаніі супраць смяротнага пакарання, праваабаронцы з «Вясны» Андрэя Палуды, выпадак са справай Паўла Селюна ўжо шосты, калі Камітэт ААН па правах чалавека прызнае несправядлівым прысуд у дачыненні да грамадзяніна Беларусі, якога ўжо няма ў жывых.

Паводле праваабаронцаў, за мінулы год у Беларусі былі выкананыя с мяротныя пакаран ні адносна Селюна, Грунова, Лыкава, Язэпчука.  Паводле праваабаронцы Андрэя Палуды, цяпер трое вязняў чакаюць магчымага выканання вышэйшай меры пакарання, двое з іх - грамадзяне Беларусі. Гэта Сяргей Іваноў, якому сёлета Вярхоўны суд пацвердзіў вышэйшую меру пакарання, а таксама Іван Кулеш, адносна якога смяротны прысуд яшчэ не быў разгледжаны судом вышэйшай інстанцыі. Трэцім вязнем камер смяротнікаў у «Валадарцы» ёсьць грамадзянін Расіі Пётар Іванік, які завочна асуджаны на смерць ў Арабскіх Аб’яднаных Эміратах за арганізацыю забойства. Калі Беларусь выдасьць гэтага чалавека ААЭ, там яго чакае хуткая смерць, мяркуе праваабаронца «Вясны» Андрэя Палуда.