Беларуская чыгунка пусціць новыя цягнікі ў Вільню, Херсон і Бар

Беларуская чыгунка ўвяла новы графік руху пасажырскіх цягнікоў, ён набыў сілу 13 снежня ад 12-й ночы, паведамляе "Радыё Свабода".

У графіку руху на 2015-2016 гады з'явіліся новыя цягнікі № 284/283 Баранавічы-Херсон (Украіна) і № 816/815 Гродна-Вільня (Літва). Цягнік, які раней хадзіў да Сімферопаля (Крым, Украіна) цяпер будзе хадзіць праз дзень летам да Новааляксееўкі (Украіна), узімку да Запарожжа (Украіна).

Упершыню Беларуская чыгунка ўводзіць бесперасадачныя вагоны Мінск-Бар (Чарнагорыя), ён будзе хадзіць летам раз на тыдзень. Тры разы на тыдзень узімку будзе хадзіць дадатковы бесперасадачны вагон Мінск-Бялград (Сербія), двойчы на тыдзень узгоднены бесперасадачны вагон Мінск-Варна (Балгарыя). У склад расейскага цягніка Масква-Варшава штодзень будуць дадавацца два вагоны Мінск-Варшава. А цягнік Мінск-Варшава, які раней хадзіў двойчы на тыдзень, цяпер будзе хадзіць «па ўказанні».

На святы і вялікія выходныя захаваныя папулярныя цягнікі на Расею: Брэст-Санкт-Пецярбург, Гродна-Масква і Брэст-Масква. Гомель-Санкт-Пецярбург (Расея) цяпер будзе штодзённым, а вось Мінск-Адэса (Украіна) стане хадзіць радзей: летам праз дзень, узімку «па датах» (раней летам ён быў штодзённым).