Назіральнікаў за масавымі мерапрыемствамі выклікалі ў суд

Сёння назіральнікам ад ПЦ “Вясна” і Беларускага Хельсінкскага камітэту Наталлі Сацункевіч і Сяргею Каспяровічу прышлі SMS-паведамленні з Маскоўскага суда з запрашэннем на судовыя разгляды іх адміністратыўных спраў.

На Наталлю Сацункевіч і Сяргея Каспяровіча былі складзеныя пратаколы па ч.1 арт. 23.34 КаАП (“Парушэнне парадку правядзення масавага мерапрыемства, якое было здзейснена удзельнікам мерапрыемства”) на мірнай акцыі, што была прысвечана дзевятнаццатай гадавіне рэферэндуму 1996 года, які значна пашырыў паўнамоцтвы прэзідэнта Аляксандра Лукашэнкі праз змены некаторых раздзелаў Канстытуцыі. Падчас выканання сваіх абавязкаў на масавым мерапрыемстве назіральнікі трымаліся адасоблена ад удзельнікаў. Яны былі абазначаныя спецыяльнымі бэйджамі і сінімі камізэлькамі, што давала магчымасць супрацоўнікам міліцыі адрозніваць іх ад удзельнікаў мірнага сходу. Аднак, міліцыянеры палічылі, што Н. Сацункевіч і С. Каспяровіч удзельнікі акцыі і склалі на іх адпаведныя пратаколы.

Па факце неправамоцных дзеянняў міліцыі праваабаронцы ўжо праінфармавалі спецыяльных дакладчыкаў ААН пра ціск на праваабаронцаў і журналістаў, а таксама звярнуліся ва УУС Мінскага гарвыканкама па прычыне адміністратыўнага пераследу назіральнікаў.

А Абсерваторыя па абароне праваабаронцаў ужо выступіла з заявай, у якойрашуча асуджае адміністрацыйны пераслед Сяргея Каспяровіча і Наталлі Сацункевіч, а таксама іншых назіральнікаў, затрыманых падчас акцыі.
Судовыя паседжанні адбудуцца ў панядзелак, 7 снежня, у 15.00 і 16.00 у кабінеце 217 суда Маскоўскага раёна г. Мінска, піша "Вясна".