Украіна адкрывае архівы КДБ

Як абвясціў кіраўнік ведамства Васіль Грыцак, архівы Камітэта дзяржаўнай бяспекі СССР неўзабаве будуць перададзеныя ва Украінскі інстытут нацыянальнай памяці, доступ да іх будзе давацца і грамадзянам Украіны, і замежнікам.

"Для Службы бяспекі Украіны працэс дэкамунізацыі з'яўляецца важным этапам у ачышчэнні СБУ ад рэшткаў і спадчыны савецкай карнай сістэмы", — адзначыў ён.

Юрыдычнай падставай для адкрыцця архіваў стаў падпісаны прэзідэнтам Пятром Парашэнкам у траўні пакет законаў па дэкамунізацыі, часткай якога быў закон "Аб доступе да архіваў рэпрэсіўных органаў камуністычнага таталітарнага рэжыму 1917 — 1991 гадоў".

Як паведаміў Грыцак, СБУ атрымлівае вялікую колькасць запытаў на архіўную інфармацыю. "Мы практычна штодня атрымліваем вельмі шмат зваротаў, як ад грамадзян Украіны, так ад грамадскіх арганізацый і замежнікаў", — сказаў ён. Большая частка зваротаў паступае ад людзей, якія шукаюць сляды зніклых або рэпрэсаваных сваякоў.

Зараз у архівах СБУ захоўваецца каля 180 тысяч тамоў спраў, створаных пры савецкай уладзе. У 2009 годзе ўкраінскія ўлады ўжо раскрылі частку архіваў савецкіх спецслужбаў, паведамляе “Наша ніва”.