Беларусь зноў хоча правесці чэмпіянат свету па хакеі

Беларусь мае намер падаць заяўку на правядзенне чэмпіянату свету па хакеі ў 2021 ці 2022, паведаміў у эфіры тэлеканала АНТ старшыня Федэрацыі хакея Беларусі Ігар Рачкоўскі.

«Мы будзем планаваць пачынаць барацьбу з 2021 года. Я думаю, 2021-2022 год – цалкам нам па сілах. Тым больш што на кожным кангрэсе Міжнароднай федэрацыі хакея, вельмі прыемна, усё ўспамінаюць, як праходзіў чэмпіянат у Менску», – сказаў беларускі спартовы функцыянер.

Пытанне пра магчымае правядзенні ў Мінску чэмпіянату свету па хакеі 2022 года ўздымалася на нарадзе ў Аляксандра Лукашэнкі, што тычылася праблемаў развіцця хакея ў нашай краіне. На сустрэчы Лукашэнка лідэр выказаў незадаволенасць сітуацыяй, якая склалася ў беларускім хакеі, раскрытыкаваў вынікі апошніх выступленняў нацыянальнай зборнай і хакейнага клуба «Дынама-Мінск». Лукашэнка таксама незадаволены працай кіраўніка Міністэрства спорту і турызму, памочніка па спорце, кіраўніка Федэрацыі хакея Беларусі.

Калі беларуская заяўка на правядзенне чэмпіянату свету па хакеі выйграе права на правядзенне першынства ў 2022 годзе, гэта будзе другі чэмпіянат па гэтаму віду спорту, які прыме наша краіна.

У 2014 годзе Мінск ужо прымаў сусветнае першынство па хакеі, па выніках якога зборная Беларусі заняла 7 месца.