Станіслаў Шушкевіч нарэшце атрымае нармальную пенсію

Аляксандр Лукашэнка ў 1997 годзе скасаваў пастанову парламента аб пажыццёвай пенсіі былому прэм'еру і кіраўніку дзяржавы ў памеры 70—75% ад акладу дзеючага прэм'ера і спікера.

Ён таксама падпісаў дэкрэт аб “упарадкаванні пенсій за асаблівыя заслугі перад беларускім народам”. Атрымалася, што пенсіі за асаблівыя заслугі былі прызначаныя ў асноўным першым асобам савецкай Беларусі, напрыклад, былым кіраўнікам Кампартыі Беларусі Мікалаю Слюнькову і Яфрэму Сакалову.

Пяцярым іншыя былым кіраўнікам незалежнай Беларусі, якія Лукашэнку не падтрымалі, — Станіславу Шушкевічу, Георгію Таразевічу, Сямёну Шарэцкаму, Мечыславу Грыбу і Міхаілу Чыгіру — дадзеным дэкрэтам пенсія была пакінутая на тым узроўні, на якім знаходзілася на момант падпісання дэкрэта. У 1997 годзе гэта было 3 196 000 беларускіх рублёў, а пасля дэнамінацыі 1999 стала 3200 рублёў у месяц.

80-гадовы Шушкевіч прынцыпова не хацеў што-небудзь прасіць і прыніжацца. Толькі цяпер жонка Станіслава Станіслававіча аформіла дакументы на атрыманне ім пенсіі па ўзросце. Цяпер першы кіраўнік Беларусі будзе атрымліваць крыху больш за 4 млн. рублёў, паведамляе “Наша ніва”.