У Мінску адкрыўся візавы цэнтр пасольства Італіі

Візавы цэнтр, які адкрыўся сёння раніцай, — не дыпламатычная ўстанова. Яго мэта — дапамагаць грамадзянам Беларусі, якія маюць намер наведаць Італію. Супрацоўнікі цэнтру кансультуюць наведнікаў, прымаюць анкеты, бяруць адбіткі пальцаў і праводзяць усе іншыя неабходныя аперацыі. За гэта беларусы мусяць аплаціць паслугі цэнтра ў памеры каля 19 еўра. Гэтыя грошы дадаюцца да кошту візы, які складае 60 еўра, удакладняе "Радыё Свабода".

Італьянскія візавыя цэнтры плануецца таксама адкрыць у Гомелі і Брэсце.

Візавыя цэнтры ў Беларусі ўжо маюць Вялікабрытанія, Літва і Латвія. У першым квартале 2016 года запланавана адкрыццё візавых цэнтраў Польшчы.

Існаванне візавых цэнтраў не азначае, што ахвотныя атрымаць візу павінны звяртацца па яе толькі сюды. Па-ранейшаму працуюць і консульскія аддзелы пасольстваў.

Паводле статыстыкі, Беларусь — чацвёртая краіна ў свеце па колькасці заяўнікаў на шэнгенскія візы. Па гэтым паказніку яна саступае толькі Кітаю, Расіі і Казахстану, дзе жыве нашмат больш людзей.