У «Карандашы» адмовіліся друкаваць «Пагоню»

Пра гэта «Радыё Свабода» распавёў адзін з кліентаў салона:

«Я хацеў надрукаваць некалькі выяваў гербаў. Сярод іх быў таксама герб „Пагоня“ узору 1991 году, то бок былы дзяржаўны. Аператар Войцік адмовіўся надрукаваць менавіта герб „Пагоня“. На маё патрабаванне паведаміць прычыну адмовы, ён пачаў сыпаць абстрактнымі фразамі кшталту, што ён не можа надрукаваць любую выяву. Пры гэтым ён не спаслаўся на нейкія забароны ці пастановы кіраўніцтва. Я прывёў той факт, што герб „Пагоня“ 14 траўня 2007 году пастановай Савету міністраў РБ быў унесены ў рэестар гісторыка-культурных каштоўнасцей. Але гэта на хлопца ніяк не паўплывала», — распавёў спадар, які назваўся Паўлам.

Павал пакінуў запіс у «Кнізе скаргаў і прапаноў» і папрасіў даць пісьмовы адказ на пытанне, на якой падставе забаронена друкаванне герба «Пагоня».

Раней друкарня «Карандаш» ужо адмаўлялася друкаваць мапу Ўсходніх могілак і запрашэнні на імпрэзу ў гонар Васіля Быкава. У той жа час друкарня вырабляе сувеніры з выявай Сталіна.