Tuzin.fm байкатуе Re:Public

Канфлікт здарыўся 11 лістапада на канцэрце гурта Nizkiz. Дырэктар Re:Public Андрэй Старцаў перашкодзіў ажыццяўленню прафесійных абавязкаў журналістам Сяргею Будкіну і Яўгену Шапчыцу, якія здымалі сюжэт пра магілёўскую каманду для тэлеканалу «Белсат».

Камеру загадалі выключыць, мікрафон схаваць і не весці здымкі мерапрыемства. Ад афіцыйных тлумачэнняў з гэтай нагоды Андрэй Старцаў і арганізатар мерапрыемства Віталь Супрановіч адмовіліся. У прыватнай размове кіраўнік Re:Public заявіў, што тэлеканалу, які не мае акрэдытацыі на тэрыторыі Рэспублікі Беларусь, нельга заходзіць у ягоную «кватэру».

«Tuzin.fm далучаецца да «Белсату». Асвятляць мерапрыемствы ў гэтым клубе надалей мы не будзем праз непавагу да журналістаў. Просім падтрымаць байкот іншых калегаў і перапрашаем музыкаў, у якіх на гэтай пляцоўцы плануюцца выступы», - гаворыцца ў заяве парталу..

«Журналіст Сяргей Будкін быў акрэдытытаваны на мерапрыемстве», – пацвердзілі прэс-службе ГА “БАЖ” дачынныя да акрэдытацыі асобы.

Нагадаем, што ў 2013 годзе аналагічным чынам журналістам “Белсату” не дазволілі здымаць у клубе “Гудвін” канцэрт гурта N.R.M.

А ў 2012-м канфлікт быў з арганізатарамі канцэрта Аляксандра Кулінковіча ў тым жа «Гудвіне».

Прадстаўнік тэлеканалу “Белсат” у Беларусі Міхась Янчук тады пракаментаваў сітуацыю наступным чынам: “Асяроддзе, у якім мы дзейнічаем, мы ствараем самі. Калі свае сваіх будуць баяцца, то мы так запалохаем адзін аднаго да смерці... Калі ўжо мы вымушаныя працаваць на адной маленькай выспачцы свабоды, то нам трэба намагацца гэтую свабоду максімальна пашыраць, а не звужаць...”.