Хутка можна будзе пагуляць у «Мову»

Гродзенскі распрацоўшчык гэтай адукацыйна-забаўляльнай гульні Антось Янкоўскі тлумачыць «Радыё Рацыя», што паўстала яна таму, што беларусам часта не стае зносін на беларускай мове.

– Для таго, каб вывучаць мову, каб былі перадумовы да моўнай практыкі паміж людзьмі, паміж сябрамі, знаёмымі. Зараз наконт мовы запусцілі на сайце talaka.by збор грошай на выданне гэтай гульні, і кожны жадаючы можа далучыцца, ахвяраваць, і першым з усіх атрымаць гульню, а таксама розныя бонусы – промакарткі, цішоткі ў падарунак ад нас. Дызайн зараз на фінальнай стадыі – распрацоўваецца, дапрацоўваецца.

Ужо праз тыдзень аўтары гульні абяцаюць правесьці тэст-драйв у Гродне. Гульня разлічана на 2-8 чалавек. „Яна будзе цікава беларусам кожнага ўзросту,” – мяркуе распрацоўшчык Антось Янкоўскі.