Мінінфармацыі загадала знішчыць наклад пасмяротнай кнігі Віталя Сіліцкага

Міністэрства інфармацыі загадала знішчыць наклад пасмяротнай кнігі палітолага Віталя Сіліцкага «Доўгая дарога ад тыраніі: посткамуністычны аўтарытарызм і барацьба за дэмакратыю ў Сэрбіі і Беларусі».

«Так, наклад знішчаны. Знішчаны па загадзе з Міністэрства інфармацыі, — пацвердзіў Фёдар Басько, — нам сказалі, што калі гэтага не зробім, то тыпаграфію зачыняць. Зрэшты, самі вінаватыя — не глядзелі, што друкуем. Калі б я гэтую кнігу ўбачыў раней, то друкаваць мы яе не сталі б».

Кніга выйшла некалькі тыдняў таму. «У вашых руках пасмяротная кніга Віталя Сіліцкага. Кніга, якую Віталь не дапісаў. Кніга — працяг даследавання «Адкладзеная свабода: посткамуністычны аўтарытарызм у Сербіі і Беларусі», якое публікавалася ў 2003 годзе ў часопісе «ARCHE» і было выдадзена асобнай кнігай у 2012 годзе год па адыходзе Віталя», — пісалася ў анатацыі.

У сваёй кнізе Віталь Сіліцкі параўнаў рэжым Слабадана Мілошавіча ў Югаславіі 1990-х і Лукашэнкі ў Беларусі.

Афіцыйна ў Беларусі дзейнічае канстытуцыйная норма аб свабодзе слова. Практыка ж разыходзіцца з літарай закона, паведамляе Наша ніва.

Віталь Сіліцкі — беларускі палітолаг, першы дырэктар Беларускага інстытута стратэгічных даследаванняў. Ён памёр у 38 гадоў ад раку, кніга мела стаць пасмяротным помнікам яму.