На экс-палітвязня Эдуарда Лобава палююць праваахоўнікі

В Украине

Пра дзіўныя візіты ў кватэру бацькоў Эдуарда Лобава паведаміла яго маці Марына Лобава.

"Яны прыйшлі рана — у 7 гадзін 10 хвілін. Хацелі зайсці ў кватэру, але я іх не ўпусціла, бо яны не мелі ордэра. Я выйшла да іх у калідор. Гэта былі двое супрацоўнікаў. Яны патлумачылі, што прыйшлі наконт майго сына. Яны пыталіся, дзе мой сын, калі я яго бачыла апошні раз. Але я адмовілася даваць паказанні. Тады яны адмовіліся казаць, з якой нагоды шукаюць майго сына і па якім артыкуле. На гэтым мы развіталіся. Яны прапанавалі мне падпісаць пратакол аб адмове ад дачы паказанняў, але я адмовілася падпісваць. Пасля гэтага яны пайшлі".

Марына Лобава не змагла патлумачыць такую пільную цікавасць праваахоўных органаў да яе сына.

"Дагэтуль было зацішша, пакуль ішлі выбары. Напэўна, супрацоўнікі міліцыі былі занятыя, а цяпер у іх стала больш вольнага часу, і, падобна, пачалі хадзіць — учора і сёння. 4 лістапада былі з крымінальнага вышуку. Здзівілі, што шукаюць яны Эдуарда за злачынства па крымінальным артыкуле 206 (рабаванне). Таксама тэлефанавалі са следчага аддзелу. Не ведаю, што будзе заўтра. Не ведаю, чаму ходзяць такія розныя службы і пра такія цікавыя артыкулы кажуць", — сказала Марына Лобава Радыё Свабода.

Былы палітвязень і сустаршыня "Маладога Фронту" Эдуард Лобаў з-за пераследу з боку беларускага рэжыму напрыканцы ліпеня таемна пераехаў ва Украіну і далучыўся да добраахвотнікаў, якія змагаюцца супраць расійскай агрэсіі. Маладафронтавец паўтарыў учынак былога беларускага палітвязня Васіля Парфянкова, які амаль адразу пасля вызвалення з горацкай турмы ў снежні 2014 года з'ехаў ва Украіну і запісаўся ў добраахвотны батальён Арганізацыі ўкраінскіх нацыяналістаў.

Эдуард Лобаў уваходзіць у склад добраахвотніцкага батальёна "Правага сектару", які размешчаны пад Марыупалем. Сваю будучыню актывіст звязвае з Беларуссю.

У 2011 годзе Эдуард Лобаў быў асуджаны на 4 гады пазбаўлення волі паводле артыкула "Хуліганства" разам з лідарам "Маладога фронту" Змітром Дашкевічам. Выйшаў на волю 18 снежня 2014 года.